「Patreon文章」完美兒童新年示範
寫文時已經係年廿七，「新年無哂氣氛」呢個現實已經好多年，不過年廿一開始要準備新年呢個傳統思想，都仲係留喺我個腦入面，直到宜家。
屋企唔算富有，但過年買新衫呢個傳統依然年年都有，我覺得好嘅傳統係好好嘅情緒治療，每當大時大節，做吓傳統嘅事，個心總係踏實啲，對時節嘅參與度好似高啲。
細個乜嘢都唔使準備，望住阿媽辦年貨、入利是，每個年初一去阿婆度，初二就去阿嫲到睇麻雀大戰，幾十人逼埋喺大窩口一間三百幾呎嘅屋入面，一衝入屋見人就「恭喜發財」，跟住一堆利是不停遞到你面前，約埋幾個老表就去樓梯口拆三兩封利是責袋，跟住有咩做？就梗係首先要避開阿媽，唔可以畀佢見到我有咁多利是，如果唔係佢就會變身稅局，成份利是就似你哋份年薪咁，按比例交返多少先可以過關。
拎住呢「筆」利是，你就好似走入一個花花世界咁，之前無得揀嘅嘢，即時變得有選擇。平時我入機舖最多都係玩二三十蚊街頭霸王，但今日剩係拆大姑姐封利是都有五十蚊，兩封加埋一佰，唔好話街頭霸王，就連我平時無錢試嘅餓狼傳說，我都可以入返十蚊八蚊試吓Terry個煤氣爐係點開。
返到大本營，姑丈拎副魚蝦蟹出嚟，小小年紀，平時一注五蚊都好似而家炒孖展咁大上落，宜家見到開咗幾次蟹，一睇就知綠色好路，跟住蝦蟹各二十蚊，諗都唔使諗，以當時我三年班兩蚊一日零用去計，一個星期返五日學，一個月四個星期，即係我一舖就買咗我一個月嘅零用錢。
咦，開兩蟹一蝦，我買架唔該，望清楚丫唔該，一百二十蚊呀，係一舖就嬴咗三個月嘅零用錢呀。
就係咁，初一加埋初二，如果運氣好嘅話，到初三時你個袋總會有返幾舊水，一個七八歲大嘅細路個袋有幾百蚊係咩概念？咪同你一夜暴富一樣，你都會想住吓大屋、買吓靚車，我當時都係一樣，總係因為錢多，而想做一啲我平時唔會做，例如…
拜年時同阿媽講我有錢，不如呢盒曲奇餅我畀丫。
係咪好似好怪？但其實係好正常，我只係想做一啲我平時以為遙不可及嘅事，我一日兩蚊貼士，曲奇餅一盒五十蚊，我平時根本就唔可能負擔到，唔係我唔想做，係我根本無可能二十五日唔用錢，喂大佬返學唔使買媽咪麵呀？
宜家我只要輕輕喺我個魔術貼星矢銀行，從容不逼咁拎張一百蚊出嚟，再喺老豆老母面前交畀收銀阿姐，我就做咗老闆，我就喺阿爸一路講「嘩咁多錢嘅你」襯托之下，完成咗一個我人生入面嘅小成就，五十蚊，抵啦。
就係咁，每一個新年入面，我總係喺假期完結前，完美咁示範乜嘢叫「冤枉嚟瘟疫去」，拎住一舊巨款，總係喺返學之前，唔知點解買吓龍虎門，落士多玩吓老虎機咁，就慢慢山洗哂啲錢，跟住返到學校，又過返我兩蚊一日零用嘅貧窮學生生活。
我嘅兒童新年就係咁樣過，一個新年十日八日假，見盡最愛嘅家人，去最中意嘅嫲嫲屋企，賭大錢，入機舖，做吓老闆，大上大落，做一啲我平時唔可以做嘅事，最後洗盡鉛華，年初四咁嘅樣返學。
呢啲新年，邊有細路仔唔中意。
所以宜家其實我唔係新年無咗氣氛，係直情已經無咗我人生中最完美嘅新年。
_______________________________________________________
Patreon平台招募讀者中：
https://www.patreon.com/sithoching
每月更新十篇散文，寫心情、寫人生、寫愛情、寫負能。
有緣免費公開，無緣跪求課金。
Search